Dövlət Statistika Komitəsinin məlumatları əsasında hazırlanmış aşağıdakı qrafikdə 2014-2024-cü illər arasında dəmir yollarından istifadə edən sərnişin sayının dinamikası göstərilmişdir. 2020-ci ildə sərnişindaşımada kəskin eniş (2,1 milyon nəfər) baş vermişdir. Bu dinamika qlobal miqyaslı COVID-19 pandemiyası və tətbiq olunan məhdudiyyətlərin birbaşa təsiridir. Təklif tərəfdən də, tələb tərəfdən də ciddi daralma müşahidə olunmuşdur. 2022-ci ildən başlayaraq sərnişin sayında davamlı və sürətli artım müşahidə edilir. 2024-cü ildə sərnişin sayı rekord səviyyəyə – 8.5 milyon nəfərə çatıb. Bu, sərnişindaşımada dəmir yollarına tələbatın kəskin artmasını göstərir. İri investisiyalar, xidmət keyfiyyətinin yaxşılaşdırılması və sərnişindaşımanın daha əlçatan olması bu artıma təkan verən əsas amillərdir. Cari dinamikanı nəzərə alaraq, 2025–2030 dövründə dəmir yolu sərnişindaşımalarının illik orta artım tempinin 8–10% arasında olacağı proqnozlaşdırıla bilər. Bu isə Azərbaycanın nəqliyyat sistemində dəmir yolunun strateji rolunu daha da gücləndirəcəkdir.
