İşçi hüquqlarının pozulmasını təsvir edən ekran işləri bu problemlərin cəmiyyətə təqdim edilməsi və məsələnin daima gündəmdə olması cəhətdən vacibdir. Əmək hüquqlarının qorunması yalnız fərdlərin deyil, bütövlükdə cəmiyyətin rifahı üçün əhəmiyyətlidir.
İşçilərin qarşılaşdıqları çətinliklər əksər hallarda kölgədə qalır . Kino sənəti isə bu reallıqları emosionallıq və vizual güclə tamaşaçıya çatdıraraq, sosial ədalət mübarizəsinin bir vasitəsinə çevrilir.
Dünya miqyasında milyonlarla insan əmək hüquqları pozularaq qeyri-insani şəraitdə işləməyə məcbur edilir. Bu kimi əsərlər həm hüquqi boşluqlara, həm də sosial ədalətsizliklərə diqqət çəkərək ictimai təzyiq formalaşdırır. Ekran işlərində real hekayələrin əks olunması tamaşaçıya problemin dərinliyini hiss etdirməyə imkan verir. Bədii filmlər təkcə sənət nümunəsi deyil, həm də sosial yaddaşın qorunması üçün güclü bir alət ola bilər. Bu əsərlər insan ləyaqətinin, azadlığının və bərabər hüquqlarının əhəmiyyətini vurğulayır. Cəmiyyətin maarifləndirilməsi, sosial dialoqun gücləndirilməsi və insan hüquqlarına hörmətin artması üçün belə filmlərin çəkilməsi vacibdir. Tamaşaçı ekranda gördüyü talelərlə həmrəylik quraraq, sosial məsuliyyət hissi qazanır.
“The Goat Life” (“Aadujeevitham”) 2024 – Xaricdə özünə iş axtaran hindistanlı bir işçi Səudiyyə Ərəbistanına gedir, ancaq o səhrada keçi çobanı olaraq maaş almadan məcburi əməyə cəlb edilir. Film hindistanlı miqrant işçi Najeeb Muhammedin real hekayəsinə əsasən ekranlaşdırılıb.
1994-cü ildə rejissor Tofiq Tağızadənin çəkdiyi “Köpək” bədii filmi bu qəbildən olan nadir filmlərdəndir. Filmin mövzusu iş tapmaq ümidilə yola çıxan insanların düşərgə kimi yerdə, qeyri-insani şərtlər altında fiziki və mənəvi məhv edilməsindən bəhs edir. Filmin ümumi ağır atmosferində insanın sadəcə sosial roluna görə deyil, həm də insan olduğu üçün qiymətləndirilməsi və bu yolda durmadan apardığı mübarizə təsvir edilir. Hər iki ekran əsəri tamaşaçını yalnız hadisələrin şahidi etməklə kifayətlənmir, eyni zamanda onu sosial məsuliyyət daşımağa çağırır.